penelin

Nôl yng Nghymru!

2006-10-09T14:40:00.000-07:00

Sori, on i ddim yn meddwl fyse na neb yn darllen hwn mwyach gan bo fi wedi bod mor ddiog a pheidio ypdetio yn ddiweddar! Ond mae'n debyg bo fi'n anghywir ar ôl i fi weld rhywun nos Sadwrn nath ofyn be on i'n neud adre achos bo'r blog yn deud bo fi yn Thailand! Wel, dwi adre ers wthnos. A bellach ma'r teimlad cyffrous o fod nôl yng Nghymru a gweld pawb wedi dod i ben a dwi yn sgint ag yn chwilio am waith!

Oedd y 3 wthnos olaf yn Asia yn wych er bo Gwawr wedi fy ngadael i ar ôl achos bo hi wedi rhedeg allan o arian! Diolch Gwawr! Na, jôc, gath Charlie a fi amser gwych, ond oedd hi yn rhyfedd iawn heb Gwawr. Nath hi fynd adre heb ddweud wrth neb a rhoi sypreis mawr i'w rhieni!!

Ethon ni i Laos a Cambodia oedd yn 2 wlad wahanol ond diddorol iawn. Er bo ni heb gael digon o amser yn yr un o'r 2 wlad mewn gwirionedd, nethon nhw greu argraff fawr arnon ni. Rhaid i mi ddweud mai Laos oedd fy hoff wlad yn ne ddwyrain Asia, yn bennaf achos bo'r tirlun a'r golygfeydd yn anhygoel - llawer o fynyddoedd a choedwigoedd a'r rhan fwyaf o bobl yn byw mewn tai pren ar lan yr afon, a'r afon yn cael ei defnyddio fel y brif ffordd yn y wlad. A roedd y bobl yn hynod o gyfeillgar, a gan bod na gyfraith yn erbyn unrhyw berthynas rhwng person o Laos a thramorwyr doedd na ddim golygfeydd afiach o hen ddynion tew a hyll efo merched asiaidd ifanc a del, fel oedd i weld mewn rhai mannau yn Thailand!!

Er bo Cambodia wedi arfer mwy â thwristiaid, yn bennaf oherwydd y temlau anhygoel yn Angkor Wat, roedd y bobl yr un mor gyfeillgar ond ddim hanner mor swil ag yn Laos! A diddorol ond torcalonnus oedd ymweld a'r amgueddfeydd a'r Killing Fields a chlywed gan bobl oedd yn cofio holl hanes ofnadwy y Khmer Rouge. Ag er ei bod hi yn bwrw glaw yn y cyfnod ethon ni yna, nethon ni fwynhau'r dyddiau olaf ar lan-y-môr yn Ne Cambodia.

Fyddai gobeithio yn gallu rhoi lluniau fyny yn fuan. Unwaith ma'r cyfrifiadur adre (sy'n arafach na'r rhai yn Bolivia!) wedi ei drwsio!

Gwlad Thai

2006-09-11T22:19:00.000-07:00

Wel, amser am ypdet arall gan bo ni erbyn hyn wedi gadael Thailand ar ol treulio pythefnos gwych yna. Ymlacio yn gyntaf ar ynys oddi ar arfordir dwyrain Thailand - Koh Tao. Ynys dawel iawn efo digon o draethau anghysbell a chyfle i weld digon o bysgod yn y mor. Bwyta bwyd Thai lyfli a dysgu chydig bach o'r iaith efo'r bobl leol hynod o glên! Oedd hi'n cymryd 7 awr mewn cwch i fynd yna ond oedd o'n bendant werth o - paradwys!!

Wedyn fyny i Bangkok oedd ddim yn gymaint o baradwys o gwbl! Ond er gwaetha rhybuddion gan deithwyr eraill pa mor afiach oedd y lle, doedd o ddim gwaeth nag unrhyw ddinas fawr, poeth, stuffy efo pawb yn trio gwerthu pethau i ni. Ond gan ein bod ni yn mynd nol yna er mwyn hedfan allan nethon ni ond aros yna am un noson cyn mynd i Kanchanaburi. Tref fach, ond pont fawr yna dros afon Kwai a llawer o amgueddfeydd yn olrhain hanes erchyll adeiladu'r bont yn ystod yr ail ryfel byd.

I fyny i Ogledd Thailand wedyn i ddinas dlws o'r enw Chiang Mai. O fana ethon ni i trekkio am 3 dwrnod yn y jyngl oedd yn lot o hwyl! Er bo hi wedi glawio am ryw 2 awr bob dydd a bo pawb yn wlyb at eu croen, doedd hi ddim yn oer felly doed neb yn poeni rhyw lawer. Fuon ni yn cysgu mewn huts bach mewn pentrefi yn y mynyddoedd. Ond yr uchafbwynt heb os oedd cael reidio ar gefn eliffant!! Ma nhw'n anifeiliaid anhygoel - mor cwl! Nai drio cael lluniau fyny yn fuan - oedd na hyd yn oed eliffant babi, ond tua 3 mis oed yn cerdded efo ni - mor ciwt!!

Ta waeth, ar ol 3 dwrnod o deithio ar fysys a chychod, da ni bellach yn Laos sydd yn dipyn tlotach na Thailand. Does na ddim banciau yn y wlad na thrydan mewn llawer o'r pentrefi ond ma'r bobl efo'r rhai mwya cyfeillgar da ni wedi cyfarfod ar y daith!

Charlie, Singapore a Kuala Lumpur

2006-08-22T04:39:00.000-07:00

Helo o Asia! Rydyn ni bellach yn Kuala Lumpur yn y gwres llethol, ond newydd gael cawod lyfli o law - nethon ni sefyll yna am chydig funudau yn cwlio lawr tra roedd pawb arall yn mynd i gysgodi, dwi'n siwr oedden ni'n edrych chydig bach yn nyts! Yn ffodus, da ni wedi cael air conditioning ymhob hostel hyd yn hyn - gobeithio fydd hyn yn parhau!

Gyrhaeddon ni Singpore o Awstralia nos Sadwrn ag aros yn y maes awyr ar gyfer Charlie, merch o Birmingham nethon ni gyfarfod yn Seland Newydd sydd wedi dod i deithio efo ni yn Asia. Oedden ni'n cael ein galw yn 'Team Wales' ar draws Seland Newydd ag Awstralia, dwi'n meddwl yn bennaf achos bo pawb yn cael trafferth ynganu enw Gwawr - erioed wedi sylweddoli fod o mor anodd a hynny o'r blaen! A gan fod Charlie wastad efo ni oedd hi'n 'honourary member' o 'team wales' a da ni wedi dysgu dipyn o Gymraeg iddi hi erbyn hyn hefyd! Mae ganddi hi flog efo lluniau o Seland Newydd ag Asia yn fuan os oes diddordeb gan rywun : http://charliedixpix.blogspot.com/

O, a newyddion chydig bach mwy difrifol - nath na griw o fwnciod bron ag ymosod arnon ni heddiw! Oedden ni yn cerdded mewn gerddi hamddenol a ddethon ni ar draws y boi Almaeneg siaradus ma nath ddeud fod na gwpwl o fwnciod i'w gweld yn bellach i lawr a rhoi ffrwythau i ni i roi iddyn nhw. Wel, aeth hi bach yn fler pan ddaeth na tua dwsin o fwncis ar ein hol ni - oedden nhw yn fach iawn ond yn fileinig iawn! Ag oedd na un gweddol fawr oedd yn trio lladd y rhai bach os oedden nhw yn mynd a'r bwyd! Oedden nhw yn hynod o hy, ag ethon ni ona yn reit sydyn ar ol i ni redeg allan o ffrwythau ag ar ol i Charlie gael ei dychryn efo flashbacks o pan nath na lama redeg ar ei hol hi a thrio ymosod arni pan oedd hi'n iau!! Lluniau o'r mwncis bach 'ciwt' yn fuan!!

Gadael Awstralia

2006-08-16T18:42:00.000-07:00

Helo! Gobeithio bod pawb aeth i'r Steddfod wedi cael amser da iawn - y Steddfod gynta i fi golli ers oes :-( A dwi'n gwbod bod hi braidd yn hwyr, ond i'r rheiny nath raddio llongyfarchiadau i chi gyd (dwi ddim yn cofio os nes i e-bostio pawb)

Wel, mae'n amser ni yn Awstralia bron a dod i ben a 'da ni wedi llwyddo i neud lot mewn 3 wythnos a hanner. Ethon ni ar drip mewn four wheel drive ar ynys dywod fwya'r byd (mae'n debyg!) - Fraser Island. 11 ohono ni yn yr un fan ag ethon ni yn styc yn y tywod 5 gwaith a llwyddo i dorri un pabell! Ond oedd o'n lot o hwyl er gwaetha'r ffaith bo ni heb weld dim siarcod :-( Mae'n rhyfedd fel mae na lawer o deithwyr o'r un genedl mewn un gwlad - yn Seland Newydd, Saeson oedd y mwyafrif; Israelis yn Bolivia; ac yn Awstralia, Gwyddelod ydy'r mwyafrif - wir, mae'n siwr fod na gymaint o Wyddelod a sydd na o Aussies!!

Ethon ni hefyd i hwylio a deifio ar y Great Barrier Reef oedd yn wych - mor lliwgar, welson ni lwyth o bysgod, ond dim jellyfish diolch byth! Bendant eisiau gwneud mwy o ddeifio - mae'n anhygoel bod ar waelod y mor, fel bod mewn byd arall.

Ta waeth, ni yn Cairns erbyn hyn ag yn hedfan i Singapore ddydd Sadwrn. Wedi gwario ein holl budget ar gyfer Awstralia ag yn cychwyn cael rywbeth sy'n ymdebygu i 'tan' - wir, on i methu coelio'r peth! Ond wrth gwrs, ma wyneb Gwawr a fi yn bla o freckles! O, wel!

Lluniau!!

2006-08-04T21:36:00.000-07:00

Jest chydig bach o luniau o Awstralia - nai roi nhw ar flickr yn fuan. A rhoi gweddill rhai Seland Newydd fyny hefyd! Jest i ddathlu bo'r camera yn gweithio yn iawn erbyn hyn!!

Awstralia!

2006-08-02T20:09:00.000-07:00

Helo o Awstralia! Da ni wedi bod yma ers rhyw wythnos erbyn hyn ac yn cael lot o hwyl. Wedi bod i Melbourne a Sydney ac ar draethau arfordir y de - braf iawn ond ddim mor boeth ag yma yn y Gogledd. Rhaid i fi siomi'r Neighbours ffans ohono chi (genod/merched May St a Nain yn bennaf!), gethon ni ddim amser i fynd i weld y set sydd jest tu allan i Melbourne. Cwpwl o nosweithiau cyn i ni gyrraedd oedd na ryw barti Neighbours ag yn bresennol oedd Libby a Karl Kennedy a'i gitar - gytud bo ni wedi colli hwnna! Fydd jest raid i fi gofio nôl at yr amser bythgofiadwy pan nath Catrin P a fi gyfarfod Joe Scully yn May Ball Aberystwyth - dyddie da!

Oedd Sydney yn grêt hefyd - yr opera house yr un mor impressive a fasech chi yn meddwl. Llwythi o dwristiad Japanese yna hefyd - oedden ni yn teimlo chydig allan o le! W, ia, welson ni kangaroo a koala bears pan nethon rentu car a gyrru ar hyd arfordir y de - cyffrous iawn! Genai luniau o'r koalas nai roi fyny yn fuan. A tra dwi'n cofio, welson ni lwyth o dolffins yn Seland Newydd hefyd - ciwt! Dipyn gwahanol i Seland Newydd yma o ran y tirlun a'r tywydd. Y bobl yr un mor laid-back a jokey, ond llawer mwy o bobl ymhobman, teimlo fel bo Sydney a Melbourne efo bron yr un faint o bobl a sy'n Seland Newydd i gyd!

Cael dwrnod gwych heddiw - yr haul yn bendant wedi dod allan i ddathlu fy mhen-blwydd i! Yn Byron Bay, tref fach glan-y-môr hippy-aidd iawn. Traeth lyfli ac eitha gwag felly newydd fod yn torheulo bore ma. Mynd ar y bws am gwpwl o oriau pnawn ma i dref arall ar lan-y-môr - Surfer's Paradise. Wnai roi lluniau fyny heno gobeithio!

Ynys y De

2006-07-14T16:27:00.000-07:00

Dyma'r olygfa oedd o'n blaen ni bore ma! Waw! Da ni yn Lake Wanaka, wrth ymyl Queenstown yn Ynys y De, Seland Newydd. Extra cyffrous achos bo nhw wedi ffilmio LOTR yma (deud y gwir, ma hynna'n wir am ran fwyaf o Seland Newydd!) Tywydd wedi bod yn wych y dyddie diwethaf ar ol cyfnod o law diflas. Nethon ni gerdded fyny Glacier yn y glaw oedd yn hwyl ond oedd pawb yn hollol wlyb at eu croen! Wedi bod yn teithio ar fysys hyd yn hyn, ond yn cael campervan dydd Llun - wohoo!! Di updatio'r lluniau chydig bach, nai drio rhoi rhai o bobman hyd yn hyn fyny dros y penwythnos (dwi wedi tynnu tua 500 erbyn hyn felly mae'n broses anodd o ddewis a dethol, gan bo fi'n siwr bo chi ddim isio gweld pob un llun diflas!) Hwyl am y tro!

Seland Newydd!!

2006-07-03T16:04:00.000-07:00

'Dy ni 'di bod yma ers tua pythefnos erbyn hyn, ag ymddiheuriadau am beidio blogio, ond ma na jest gymaint o bethau i neud yma. Ond ma mae hi'n pistyllio bwrw glaw heddiw am y dwrnod cyntaf ers y dwrnod gyrhaeddom ni. Mewn tref o tua 50,000 o bobl ar dop Ynys y De - Nelson. Sydd weithiau'n cael ei galw yn 'Sunny Nelson' am bo hi mor braf, ag wrth siarad efo rhyw foi mewn siop ddoe sydd di symud yma ers blwyddyn a hanner 'di o ond di gweld 3 dwrnod o law yma - typical! Mae fod yn neis fory beth bynnag!

Ta waeth, er bo hi'n gaeaf yma ma hi wedi bod yn braf iawn, er ddim cweit digon braf i fentro i'r môr. Fuon ni ar 'Ninety Mile Beach' reit yng Nghogledd y wlad sydd fwy fel chwech deg milltir, ond oedd o wir yn drist achos oedd na forfil wedi cael ei adael ar ôl gan y llanw a bron a marw ar y traeth :-( a doedd na ddim byd oedden ni yn gallu neud. 'Da ni hefyd wedi bod yn kayakio, ogofeuo efo glow worms ac yn awyr-ddeifio (sky-diving?!) Waw, oedd o'n anhygoel, dim ond 45 eiliad o 'free falling' sef jest syrthio o'r awyren cyn i'r parachute agor - oedd yn hen ddigon cos o'n i'n teimlo fel bo fi methu anadlu. Ond oedd o'n wych pan oedd y parachute yn agor achos o'n i'n gallu gweld bob dim islaw a gwerthawrogi'r golygfeydd!

Er yn anffodus gethon ni ddim amser i fynd i weld Hobbiton o Lord of the Rings (a mae'n blincyn drud achos mae ar fferm breifat) nethon ni hikio o dan Mount Doom ag aros mewn hotel lle oedden ni'n edrych allan drwy'r ffenest a'i weld o! Lle braf iawn, ag oedd yr hotel wedi gneud camgymeriad felly oedd na ddim digon o le i ni yn y stafelloedd backpackers felly gethon ni stafell hiwj en suite efo teledu a frij a coffi a bob math o hyfryd bethau erill - mor cwl nethon ni aros am 3 noson! Ond, doedd na ddim tân yn chwistrellu allan o Mount Doom yn anffodus, ag roedd o'n wyn efo eira, ond dal yn edrych yn anhygoel. A nethon ni drio 'chydig o snow-boarding yma hefyd! Erioed wedi syrthio ar fy mhen ôl gymaint o weithiau, ond oedd o'n lot o hwyl!

Beth arall sydd i'w ddweud - ma Wellington y brifddinas yn neis iawn, ac Auckland, y ddinas fwyaf yn weddol, ond dydy lot o bobl ddim yn hoff o'r lle. Does na ddim llawer o ddinasoedd mawr wedyn heblaw am y ddwy yna, felly lot o lefydd gwledig - dipyn fel Cymru, yn enwedig efo'r holl ddefaid! Mae pob man i weld yn lân a ma'r bobl yn hynod o ofalus efo'r amgylchedd ac edrych ar ôl eu tirlun. Mae'r Maoris, sef y bobl oedd yn byw yma cyn yr Ewropeaid ac mae'n ddiddorol iawn cael gwybod am eu hanes. Lot o barch tuag atyn nhw erbyn hyn ar ôl cael eu trin yn wael yn y gorffennol, ag er mae ond tua 50,000 sy'n gallu siarad Maori, mae gennyn nhw sianel deledu eu hun sydd efo dipyn mwy oriau o Maori na sydd gan blincyn S4C o Gymraeg! O, a nethon ni ddysgu sut ma neud yr haka - wel, yr haka benywaidd sydd ddim cweit mor fygythiol ag un y dynion!

Nethon ni groesi ddoe i Ynys y De sydd yn ôl llwyth o bobl yn hyd yn oed gwell nag Ynys y Gogledd - anodd i'w gredu!

Diwedd y daith yn Ne America

2006-06-29T03:14:00.000-07:00

Ar ôl ymweld â'r Cymry ym Mhatagonia, dim ond 'chydig llai na phythefnos oedd gennon ni ar ôl yn Ne America. Ethon ni i dref o'r enw Bariloche sy'n ardal y llynnoedd yn yr Ariannin ag yn agos at y ffin gyda Chile. Lle prydferth iawn efo lot o lynnoedd a lo t o eira, golygfeydd gwych, yn enwedig pan ethon ni i ferlota o amgylch un o'r llynnoedd. Ond yn anffodus nath hi fwrw glaw yn drwm am tua tri diwrnod tra oedden ni yna, a mae'n debyg fod pethau'n waeth yn Chile felly yn hytrach na chroesi'r ffin yno, nethon ni aros yn yr Ariannin a theithio i fyny.

Aros yn Mendoza wedyn am chydig ddyddiau. Dyna lle mae 70% o win yr Ariannin yn cael ei gynhyrchu felly rhaid oedd ymweld â'r gwinllannoedd, a hynny ar gefn beic! Oedden ni yn teithio efo Albanwr, Geordie a Ffrancwr erbyn hyn a nath 2 o rheiny benderfynu fysen nhw'n trio reidio tandem o amgylch y gwinllannoedd - doniol iawn! Er, Gwawr a fi nath reidio arno fo rhan fwyaf achos doedden nhw ddim yn rhy saff arno fo - typical! Nethon ni dipyn o ddringo, abseilio a mynd i byllau thermal yn y mynyddoedd hefyd, lot o hwyl. A thywydd llawer gwell nag yn y de.

I Santiago wedyn, ac roedd y daith yno o Mendoza drwy'r mynyddoedd yn anhygoel - mynyddoedd anferth gwyn ar bob ochr i ni! Ond roedd hi'n oer iawn, a Fabien druan (y Ffrancwr oedd yn dal i deithio efo ni) yn gwisgo shorts wrth groesi'r border - pawb yn meddwl bo hyn yn ddoniol iawn ag yn meddwl ei fod o'n Americanwr, a gan nad oedd o yn deall dim Sbaeneg na llawer o Saesneg oedd o jest yn gwenu a nodio ar bawb! Dim problem wrth groesi'r border, er roedden ni'n eitha trist i adael yr Ariannin. Wedi dod i hoffi'r wlad yn fawr, bwyd neis iawn yn rhad iawn! Ag, ron i yn arbennig o drist o adael gwlad Dulce de Leche - os dy chi di bod yna newch chi ddeall be dwi'n feddwl - mae fel saws toffi sy'n cael ei ddefnyddio fel jam a ma nhw yn ei roi o ar bob un peth bron, blasus iawn! Mae'n debyg bod na siop yn gwerthu fo yng Nghanolbarth Cymru yn rhywle, fydd rhaid i fi fynd i chwilio!

Roedd Santiago braidd yn siomedig. Ar ôl gweld golygfeydd mor fawreddog yn Chile cyn cyrraedd y brifddinas, roedden ni'n disgwyl gweld llawer o'r mynyddoedd yno gan bo'r ddinas wedi ei hamgylchynu gan fynyddoedd mawr oedd erbyn hynny yn eira i gyd. Ond roedd na jest gymaint o smog yno, doedden ni methu gweld dim byd. Heblaw am hynny, mae hi'n ddinas eitha pleserus a datblygedig. Ond ma na gyplau ymhobman, a rhai ardaloedd yn arbennig o rhamantus, fel nath y 3 ohonon ni ddarganfod yn rhyw hwyr - awkward iawn!

Ar ôl tua 3 dwrnod yn Santiago, oedden ni yn pacio'n bagiau am be oedd yn teimlo fel y canfed tro ar gyfer hedfan i Auckland yn Seland Newydd, cyffrous iawn! Y 2 ohonon ni yn edrych mlaen yn fawr i gyrraedd y wlad, a fi yn arbennig yn edrych ymlaen at y daith yn yr awyren o 13 awr, er dwi'n meddwl nes i gysgu 'chydig gormod achos nes i redeg allan o amser i neud yr holl bethau cwl sydd i neud ar awyren (swnio'n sad dwi'n gwbod, ond am ryw reswm dwi wir yn mwynhau bod ar awyren neu fws neu rwbeth - rhyfedd!) Ta waeth, fyddai nôl yn fuan efo hanes yr wthnos gyntaf yn Seland Newydd!! (Dim mynedd i ddarllen dros hwn sori felly anwybyddwch umrhyw gamgymeriadau!)

Patagonia!

2006-06-21T21:37:00.000-07:00

Wps, dwi wedi colli hi chydig ar y blog ma eto! Sori fawr! Ta waeth, dyma chydig o hanes Patagonia.

Gethon ni fws lawr i Puerto Madryn, lle nath y Cymry cyntaf lanio a byw mewn ogofeydd wrth y môr. Welson ni y cerflun o'r Fam Gymreigyn wynebu'r tir ac yn cefnu ar y môr a Chymru! A'r cerflun o'r Indiad, am eu bod wedi bod yn gymaint o ffrind i'r Cymry a setlodd yma. Tywydd braf iawn i feddwl bod hi'n gychwyn y gaeaf ac ar ein trip o amgylch Penilnsula Valdes nethon ni weld llewod môr, elephant seals a morfilod! Newydd gyrraedd oedd y morfilod ag oedden ni yn lwcus iawn i'w gweld nhw - welson ni 2 yn nofio wir yn agos at y lan - anhygoel! Ag mi welson ni un pengwin bach yn nofio, oedden ni yn lwcus i weld hwn hefyd achos bo'r pengwins i gyd wedi gadael, mae'n rhaid bo hwn wedi colli ei ffordd! Er bo fi di bod yna o'r blaen a'r tro yna welson ni lwyth o bengwins oedd o dal wir yn gyffrous!!

Wedyn ymlaen i Drelew sy'n dref eitha mawr, ond yn bendant oddi ar y 'tourist trail'. Pawb yn gofyn o lle oedden ni yn dod a wedyn deud bod eu hen nain neu taid nhw o Gymru neu efo enw Cymraeg, neu eu bod nhw yn nabod rhywun efo enw Cymraeg, neu yn byw ar stryd efo enw Cymraeg! Ond nethon ni ddim cyfarfod neb yn siarad Cymraeg tan i ni gyrraedd y Gaiman ag aros yng Nghwesty Tywi sy'n lle hyfryd, a dim ond ni oedd yna felly gethon ni'r lle i ni ein hun! Oedd pawb wir yn gyfeillgar a lot o'r hen bobl yn siarad Cymraeg hollol berffaith ond heb fod yng Nghymru o gwbl! Nethon ni gyfarfod Mari, yr athrawes Gymraeg o Gymru sy'n gweithio yna. Oedd hi i weld wir yn mwynhau ei hun ag yn deud bod hi erioed wedi siarad gymaint o Gymraeg a phrin wedi gorfod dysgu Sbaeneg! Gethon ni fwyd yn un o'r tai te yna oedd yn wych - Gwawr yn falch iawn o gael te 'go iawn' unwaith eto, a gethon ni gymaint o gacennau oedden ni prin yn gallu symud drwy'r pnawn! Efo help Nivea, gwraig hynod o gyfeillgar o Ddolavon, nethon ni lwyddo i weld bedd un o berthynasau Nain Gwawr, a mynd i weld un o berthynasau fy Nain i - Ieuan. Mae'n o'n byw ar fferm fach rhwng y Gaiman a Dolavon a roed bod yn ei dy fo fel bod ar ffermdy nôl yng Nghymru, oedd o hyd yn oed yn gwrando ar ryw noson lawen ar y radio! A gethon ni ddarn o gacen a chwrw Quilmes ganddo fo i de! Gethon ni fwyd hefyd efo teuluoedd Gladys a Glenda (chwiorydd gwraig oedd Gwawr wedi gyfarfod yng Nghymru) - oedden nhw yn gyfeillgar iawn ag yn hynod o excited ynglyn a'r gêm rygbi yn Puerto Madryn ar y penwythnos. (Dwi'n siwr oedden nhw hyd yn oed yn fwy hapus pan nath yr Ariannin ennill!) Rhywbeth arall ma nhw'n edrych ymlaen yn arw ato ydy Bryn Fôn yn mynd nôl allan yna yn mis Hydref i ffilmio feature length film yna! Coming soon to a theatre near you!

Ar ôl cael amser gwych yn y Gaiman ethon ni ar draws y dyffryn i Esquel. Taith ddigon diddorol ar y bws wrth i'r bus drivers force feedio mate i ni (te ma PAWB yn yr Ariannin yn yfed - ti'n gymryd sip allan o'r straw metal a wedyn pasio fo ymlaen - mae nhw'n mynd rownd efo fflasks yn llawn dwr poeth i ychwanegu ato, ond oedd gan rhain stôf campio ar y bws!) Dydyn Sbaeneg ni ddim yn rhy wael erbyn hyn felly oedden ni yn dallt yn iawn pan oedden nhw'n gofyn i ni fynd allan i ddawnsio efo nhw ond yn smalio chwarae ffwl er mwyn osgoi deud na! Ond pwy ddath i helpu efo'r cyfieithu ond rhyw hen ffarmwr clên o'r enw Vincent oedd yn siarad Cymraeg glân gloyw ond erioed wedi bod i' Gymry. Mae'n byw ar fferm yn Nhrevelin, ag os dych chi'n gwylio Cefn Gwlad ma siwr bo chi yn ei nabod o achos mae o wedi bod arno fo llwyth ag oedd on deud wrtha ni bod o'n dipyn o celebrity a'i fod o'n cael ei spottio gan Gymry yn ymweld a Threvelin! Classic! O gan bo fi yn dod o Gaerdydd oedd on meddwl fyswn i yn nabod yr actor Matthew Rhys, felly dwi fod i gofio ato fo ag atgoffa fo bod rhaid iddo fo fynd i aros efo Vincent ar ei fferm!

Un o'r pethau cynta nethon ni yn Esquel oedd mynd i noson Gymraeg yn yr ysgol yno, noson Gyri Gymreig! Diddorol iawn, yn enwedig am bo bron neb yno wedi trio cyri o'r blaen! Chwarae teg i Claire yr athrawes yno am gwcio'r holl gyri i bawb - blasus iawn! Dipyn yn siarad Cymraeg yna, nifer fawr yn dysgu ag yn hynod o frwdrfydig ynglyn a'r iaith ag yn gystadleuol iawn ynglyn ag ennill baner Cymru yn y cwis! (oedd i gyd am gwpan y byd felly yn amlwg oedd Gwawr a fi yn gallu ateb pob cwestiwn!) Gethon ni drip bach i Drevelin hefyd sy'n le hyfryd a don i ddim yn cofio bod yno rhyw lawer pan ddes i 5 mlynedd yn ôl. Gweld yr ysgol fach ciwt yna lle ma Catrin, athrawes wirfoddol yn aros am fis. Ag i goroni ein hamser hyfryd ni wrth yr Andes, nath hi fwrw eira ar ein bore ola ni felly oedd pobman yn wyn - grêt!

Nôl yn fuan efo hanes Bariloche, Mendoza a Santiago.

Buenos Aires

2006-06-14T16:51:00.001-07:00

Taith 20 awr oedd yn ein disgwyl ar ôl Iguazu er mwyn cyrraedd y brifddinas, Buenos Aires. Er bo hyn ddim yn swnio´n rhy bleserus, dwi´n eitha hoff o fysys ar y cyfan (heblaw yn Bolivia!), oedd hon yn un o´r teithiau bysys gorau - bwyd lyfli, gwin, ffilmiau, fleece blanket a digonedd o le i blygu´r gadair nôl fel gwely! Rhywbeth felma sydd angen i drawsnewid y Traws Cambrian!

Ta waeth, gethon ni wthnos wych yn Buenos Aires, dipyn o ymlacio achos ein bod ni´n teimlo fel ein bod ni wedi bod yn teithio´n ddi-ddiwedd ers sbel. Lot o fwyta steaks a gwin rhad, a dipyn o siopa, ond dim gormod gan fod gennon ni ddim llawer o le yn ein bagiau i gario lot mwy! Dipyn o newid i gyrraedd y ddinas gan ei bod hi yn llawer mwy datblygedig na phobman arall da ni di bod iddo mor belled yn Ne America. Teimlad eitha Ewropeaidd i´r lle a Gwawr a fi yn teimlo dipyn fel tramps am fod lot o´r bobl leol mewn rhai ardaloedd yn gwisgo´n smart iawn. Mae na ardaloedd di-freintiedig yno hefyd wrth gwrs ond dydyn nhw ddim hanner mor amlwg ag yn Peru a Bolivia.

Mae yna ddigon i weld yna hefyd, ac yn ffodus i ni oedden ni yn rhannu stafell efo Sbaenwr o´r enw Carlos oedd yn dipyn o gymeriad ac yn ffansio ei hun fel arbenigwr ar Buenos Aires! Er i ni gael dipyn o sioc bod yna gymaint o bobl yn gallu siarad ychydig o Saesneg yna, oedd hi´n ddefnyddiol cael rhywun efo ni oedd yn siarad Sbaeneg. Ond er gwaetha hynny, cafwyd rhai sefyllfaoedd penblethus gan fod Sbaeneg Sbaen a´r Ariannin (sy´n cael ei alw´n Castellano) yn eitha gwahanol, a doedd Carlos na´r waiter mewn un bwyty ddim yn deall ei gilydd o gwbl, ond yn ffodus i Gwawr ddath y steak yn raw beth bynnag!

Oedden ni wedi cyfarfod Carlos cynt yn Iguazu, felly ´chydig o gyd-ddigwyddid oedd bo ni´n rhannu´r un stafell a fo yn yr un hostel allan o´r cannoedd sydd yn Buenos Aires. Ond roedd yr hostel yna´n llawn o gyd-ddigwyddiadau rhyfedd. ´Nath 2 berson arall oedd yn yr un stafell a ni oedd ddim yn nabod ei gilydd sylweddoli eu bod nhw´n byw rownd y gornel i´w gilydd yn Llundain. Nath un o´r staff gynhyrfu wrth glywed bo ni o Gymru a dechrau sôn a ryw fechgyn o Gymru oedd wedi bod yn ei e-bostio hi ag yn dod i aros i´r hostel ym mis Mehefin - un o rheiny yn troi allan i fod yn Ifan sy´n byw efo Poj. Ag yn fwy cyffrous na dim nethon ni gyfarfod y person cyntaf yn siarad Cymraeg (ddim yn cyfri Alys). Nia oedd ei henw hi o Ddinbych ac roedd hi´n rhannu stafell efo ni hefyd, ag fel mae´n digwydd ma hi´n byw drws nesa i chwaer Nain Gwawr! Byd bach - mundo pequeño!

Hm, be arall nethon ni - gweld bedd Evita; mynd i´r clwb nos mwya dwi ´rioed wedi bod iddo (y dywediad ´quality not quantity´yn dod i´r meddwl) tan iddi wawrio; a gweld y Da Vinci Code yn y sinema (ddim cystal a´r llyfr a diwedd siomedig). O, a nath Gwawr gael torri ei gwallt a chael sbectols newydd - bydd lluniau o´r ´new look´ i´w gweld yn fuan!

Iguazu

2006-06-06T10:39:00.000-07:00

Er mai byr iawn oedd ein hamser yn Brazil gan bo ni heb fwriadu mynd yna o gwbl, oedden ni wedi clywed gymaint am raeadrau Iguazu sydd ar ffin Brazil, Yr Ariannin a Paraguy, oedd rhaid i ni drio ymweld a nhw yn sydyn. Gethon ni gwmni Almaenes glen o'r enw Andreaar gyfer y rhan yma o'r daith. Oedd hi'n 'chydig hyn na ni, yn cymryd seibiant o'i swydd fel optegydd. Ac oedd hi'n llawn cyngor ar ein cyfer ni achos ei bod hi bron a chyrraedd pen ei thaith ar ol (sori, dim to bach ar y cyfrifiadur yma!) bod yn teithio am flwyddyn, ac wedi bod i ran fwyaf o'r gwledydd 'dy ni'n mynd iddyn nhw - handi iawn!

Gan bo'r rhaeadrau ar y ffin, mae modd ymweld a nhw o ochr Brazil a'r Ariannin a gan bod na olygfa eitha gwahanol o'r 2 nethon ni benderfynu gwneud y 2. Profiad hollol anhygoel gan eu bod nhw mor fawr a bod na gymaint i weld. Allwch chi dreulio oriau jest yn syllu arnyn nhw. Mae na lawer mwy i weld o ochr Yr Ariannin (tua 250 o raeadrau i gyd) - ond mae'n bendant werth eu gweld o ochr y 2 wlad. Gethon ni tip bach gan ryw fechgyn oedden ni wedi cyfarfodtua wythnos cynt am le cudd lle oedd llwyth o raeadrau a dim pobl yna am bod neb yn gwybod am y lle. Oedd hwnna'n gret - fel paradwys personnol i ni, er doedd na ddim gymaint a hynny o bobl yna gan bo hi'n tynnu am eu gaeaf nhw. Ond oedd hi dal yn ddigon cynnes i nofio yn yr afon yna, wel falle mai nid cynnes 'di'r gair, ond cynhesach na'r mor yng Nghymru yn yr haf!

Dal yn fyw!!

2006-05-25T09:35:00.000-07:00

Wel, wel, ymddiheuriadau lu am beidio sgwennu yma ers sbel - gobeithio bo rhywun yn dal i ddarllen! Ni phoener, ma Gwawr a fi yn dal yn fyw ag yn dal i fwynhau, jest fi sy´n ddiog! Ag yn ddiamynedd efo cyfrifiaduron annoying! Dwi tu ôl hi ar y downloadio lluniau hefyd sori, a rywsut dwi wedi neud rwbeth i´r camera sy´n golygu bo rhai lluniau yn dod allan yn blurry a bo´r haul wir yn llachar, so sori eto - all rywun roi cynnig ar be ma hyn yn golygu a be sydd raid i fi neud i gal o nôl?! Sa´n handi bod yn dechnolegol weithiau!! Ta waeth, ma na loads wedi digwydd yn y mis diwethaf, da ni yn Buenos Aires erbyn hyn, wedi teithio drwy Bolivia a Brazil! Nai drio cofnodi´r prif bethau diddorol sydd wedi digwydd!

Lago Titicaca

Ar ôl gadael Cuzco ethon ni i Puno, tref agos at Bolivia yn edrych allan ar Lago Titicaca sef llyn mwyaf De America ac un o´r uchaf yn y byd y gallwch fynd ar gwch arno(ma popeth yn Bolivia yn ¨yr uchaf yn y byd¨!) Mae un ochr yn perthyn i Peru a´r ochr arall i Bolivia. Yn anffodus dim ond amser i weld ochr Peru gethon ni ag ymweld â´r ynysoedd rheiny. Ethon ni i weld ynysoedd Uros sydd hefyd yn cael eu galw´n ´floating islands´sef ynysoedd bach iawn wedi eu gwneud o wellt sy´n arnofio ar y dwr ag yn symud o gwmpas. Rhyfedd iawn oedd gweld un o´r bobl leol yn gwneud twll yn y llawr a dyna lle oedd y llyn! Ddim y lle delfrydol i fyw os ´di rywun yn seasick, ond oedden nhw i weld yn eithaf hapus, tua 7 teulu yn byw ar bob ynys mewn hut bach yr un. Wedyn tua 3 awr i mewn i ganol y llyn oedd 2 ynys naturiol fawr a nethon ni aros noson ar Ynys Amantani efo teulu lleol. Lle hyfryd, heddychlon iawn gan nad oedd ceir i weld o gwmpas a dim trydan chwaith, dim ond am ychydig oriau´r dydd mae´n debyg. Dim llawer o obaith cyfathrebu efo´r teulu oedden ni´n aros efo nhw llawer efo´n lefel ni o Sbaeneg ar ffaith eu bod nhw yn siarad yr iaith Quechua efoí gilydd, ond oedd o dal yn hwyl, ag oedd na 2 fachgen bach rili ciwt a chwareus yn lle oedden ni´n aros hefyd! Yn y nos gethon ni fynd i ryw fath o ddawns leol a chael gwisg draddodiadol y merched i wisgo gan Celia oedd yn ein dangos ni o gwmpas. Dillad cynnes iawn felly oedden ni braidd yn boeth ar ôl yr holl ddawnsio egniol, a gan fod yr hollol ferched yn dipyn llai na ni oedden ni´n edrych braidd yn awkward!

Alys a La Paz

O Puno wedyn i brifddinas Bolivia - La Paz (y brifddinas uchaf yn y byd - dwi´n iawn tro yma, er mae´n debyg bod Sucre yn rhannu´r teitl o brifddinas Bolivia neu rwbeth - cymysglyd!). Ag mae hi´n dipyn o ddinas hefyd, llawn prysurdeb, pobl a thacsis a bysys yn gyrru yn wyllt. Doedd Gwawr ddim yn rhyw hoff o´r lle gan fod o mor uchel a lot o lygredd yn yr aer yn effeithio ar ei hanadlu, a gath ei phoncho hi ei pick-pocketio (pam?) a gath hi food poisoning! Nethon ni dreulio dipyn o amser efo Frank a Dan, 2 Americanwr oedden ni wedi gyfarfod yn Puno, a nethon ni feicio i lawr ¨The Most Dangerous Road in the World¨, sy´n cael yr enw achos mai dyna´r ffordd ble mae´n mwyaf o farwolaethau´n digwydd y flwyddyn. Ddim yn swnio yn beth call iawn i wneud, ond mae´n llawer mwy peryglus mewn cerbyd nag ar feic achos bo´r ffordd mor gul a serth, ag mae´n debyg bo´r damweiniau´n digwydd yn y nos tra mae gyrrwyr loris yn gyrru ag yfed. Gethon ni brofiad digon saff er i Gwawr ddisgyn spectacularly oddi ar ei beic, pen gymta dros yr handlebars! Yn anffodus iawn on i o´u blaen hi ar y pryd felly nes i ddim gweld, ond cafwyd digon o reconstructions gan bobl oedd wedi!

Y peth mwyaf cyffrous ddigwyddodd i ni yn La Paz fodd bynnag oedd cyfarfod Alys!! I´r rheiny sydd ddim yn nabod Alys, ma hi´n ffrind i fi o´r ysgol sydd wedi bod yn Ne America ers mis Hydref yn gweithio a theithio yn Ecwador, Peru a Bolivia. Oedd o´n grêt ei gweld hi, rhyfedd iawn gweld wyneb mor gyfarwydd mewn lle mor anghyfarwydd! A nethon ni dreulio ein dyddiau yn La Paz efo hi yn siopa a bargeinio am souvenirs (wel, hi mwy na ni gan bo hi wedi casglu tua 3 bag mawr ychwanegol ers cychwyn teithio!), bwyta mewn caffis amheus a chymryd bysys lleol random a gweld lle oedden nhw´n mynd! Lot o hwyl! Trist oedd gorfod ffarwelio efo hi ond oedd hi´n mynd nôl i Ecwador drwy Peru, wedyn i Colombia i dreulio gweddill ei mis a hanner yn sgwennu eu dissertation i coleg. Felly fydd hi nôl yng Nghaerdydd yn fuan i´r rheiny sydd yn ei cholli hi!

Bysys Bolivia!

Un o´r pif broblemau gethon ni yn Bolivia oedd eu bod nhw wedi cychwyn streic bysys ar y cyntaf i Fai oedd i barhau tan Duw a wyr pryd. Oedd o dal ymlaen pan oedden ni´n gadael y wlad 10 diwrnod yn ddiweddarach. Golygodd hyn bo ni yn styc yn La Paz a hirach nag oedden ni wedi bwriadu a methu gneud rhai o´r pethau oedden ni am neud yn Bolivia sef mynd i´r llynnoedd halen yn Uyni. Nethon ni hedfan i Sucre oedd ddim yn rhy ddrud ag yn dref hyfryd, a chyfarfod Berber o'r Iseldiroedd a theithio efo hi am dipyn. O fano gethon ni daxi rhad i Potosi i weld lle oedd y mwyngloddiau arian oedd yn arfer bod yn bwysig iawn tua´r unfed ganrif ar bymtheg ag oedd y dref fwyaf yn Ne America ar y pryd. Oedden nhw yn ddiddorol iawn, er bo´r gwaith wedi sychu fyny llawer, ag oedd y dref yn llawn o Eglwysi Catholig.

Ein bwriad ni wedyn oedd hedfan o Sucre i Santa Cruz ond drwy lwc nethon ni glywed am rhyw fysys lleol oedd yn gadael o gyrion y dref felly nethon ni lwyddo i ddal un o rheiny. Fuon ni yn lwcus iawn dwi´n meddwl, achos pan gyrheuddon ni oedd pobl yn ymladd eu ffordd ar y bws a pan nath na fight go iawn gychwyn nath y bws gychwyn gyrru efo tua 7 o bobl yn hongian oddi arno fo. Nethon ni anobeithio dipyn gan na fysa´n debygol bo ni yn gallu gwthio heibio i ddynion Bolivian blin! Dyna pryd nath rhyw hen ddynes gychwyn siarad efo ni heb i ni ddallt llawer ond ethon ni mewn taxi efo hi a ryw 5 mercha arall, oedden ni yn meddwl bo ni yn mynd yr holl ffordd i Santa Cruz am 15 awr yn y taxi hollol cramped yma, ond yn lwcus ar ôl tua 5 funud nath o stopio a chyrraedd y bws oedd wedi parcio mewn rhyw lay-by lle oedd na jest digon o seti i ni - rhyfedd iawn, ond lwcus!! Nethon ni dreulio´r dwrnod wedyn yn Santa Cruz sy´n dref lot mwy datblygedig na gweddill Bolivia, a wedyn bws am y border gyda Brazil. Nath be oedd i fod i dreulio 15 gymryd 30 a throi alla i fod yn dipyn o hunllef. Nath y bws grasho efo truck oedd ddim wedi troi ei olau ymlaen, yn lwcus nath neb frifo´n ddifrifol heblaw un ddynes ath i´r ysbyty. Ond oedd o´n dipyn o sioc gyda´r plant ar y bws i gyd yn crio, ac roedd raid i ni aros cwpwl o oriau yn yr oerfel am fws arall. A nath hwnnw droi allan i fod yn dipyn o racsyn oedd yn torri lawr bob tua 2 awr, a heb gymaint o seti a´r bws blaenorol felly nath Gwawr a fi dreulio tua 8 awr ar y llawr yn trio cysgu ar ôl cynnig ein seti i ryw gwpwl druan fyddai wedi gorfod treulio 25 awr ar y llawr oni bai am hynny!! Ddim yn hynod o gyfforddus, ag oedden ni´n falch iawn i gyrraedd pen y daith yn Quijarro!!! Ag felly dyna'n cyfnod yn Bolivia wedi dod i ben, a dwi'n meddwl fod Gwawr yn reit falch! Nethon ni ddim llwyddo i neud popeth oedden ni wedi gobeithio, ond nath popeth ychwanegu at y profiad! Mae hi'n un o'r gwledydd tlotaf yn Ne America ac felly yn un o'r rhataf, sy'n dda i ni, ag yn esbonio pam bod na lwythi ar lwythi o deithwyr o'r Israel yna (ma nhw yn cyfaddef hyn en hun!) Ond lle diddorol iawn, swn i'n argymell o i unrhyw un ond gwnewch yn siwr bo gennoch chi stumog gryf!

Brazil - Y Pantanal

Wrth gychwyn teithio, doedden ni ddim wedi bwriadu mynd i Brazil. Yn bennaf achos bo gennon ni ddim amser, ag y bysen ni siwr o fod wedi bod eisiau treulio lot fawr o amser yna, felly oedden ni am fynd yna mewn ar drip arall yn y dyfodol!! Ond gan ein bod ni wedi methu mynd i'r goedwig law yn Bolivia (weler y pennod ar y bysys!), nethon ni benderfynu y bysen ni'n mynd i'r Pantanal, y jyngl yn Ne Brazil, uwchben Paraguy sydd ar y ffordd i Raeadrau Iguazu a'r Ariannin. Oedd cyrraedd Brazil yn grêt ond yn dipyn o sioc, y newid o Bolivia yn amlwg - pawb yn hynod o gyfeillgar a hapus, cerddoriaeth ymhobman a phopeth yn amlwg yn fwy datblygedig. Nethon ni lwyddo i drefnu trip i'r Pantanal yn syth ar ôl cyrraedd a felly teithio 3 awr arall mewn truck i ganol y jyngl. Welson ni lwyth o anifeiliaid ar y ffordd gan gynnwys lot o alligators, ryw lygoden fawr hollol massive - oedd na lwyth ohonyn nhw ymhobman, a lot o adar fel toucan. Oedden ni'n cysgu mewn hammocs mewn hut bach, neu 'alsal' fel oedd ein roomates Israeli yn eu galw nhw - nes i lwyddo i ddysgu tua 10 gair o Hebraeg! Ond oedd hi braidd yn oer yn y nos ag oeddeni methu symud llawer yn yr hammocs. Ond poeth iawn bob dydd felly mynd i nofio yn yr afon (efo'r alligators) a neud amryw bethau eraill fel merlota, mynd mewn cwch a physgota. Ges i dipyn o lwyddiant ar fy nhro cyntaf yn pysgota, yn dal 4 pirhana, tra bo neb arall wedi dal dim - hm, rhyfedd!! Ges i ddim cyfle i ychwanegu at y nifer achos ddath yr alligator ma chydig yn rhy agos ato ni! Yn anffodus, dydyn nhw ddim yn flasus o gwbl, ag on i'n teimlo reit sâl y bore wedyn! Ond heblaw am hynny, gethon ni amser grêt! Oedd y guides i gyd yn glên iawn, ag oedden nhw i gyd wedi cyfarfod lot o dwristiaid a drwy hynny wedi dysgu Saesneg, Hebraeg, Almaeneg ag amryw o ieithoedd eraill - anhygoel! Ond oedd hi'n anodd iawn dallt Portiwge-eg (sori - sut ma silafu hwn?) oedden nhw'n siarad ar ôl dod i arfer gymaint efo Sbaeneg. Oedden ni braidd yn gytud bo ni methu mynd i Sao Paolo a Rio a gweddill yr arfordir ar ôl clywed mor dda ydy nhw gan deithwyr eraill, fydd jest rhaid i ni fynd nôl rhyw ddydd!!!

Reit, hynna'n ddigon o draethu am y tro! Fyddai nôl yn fuan (dwi'n addo!)

Peru - Te Coca, Incas a Blisters

2006-04-23T15:55:00.000-07:00

Helo o Peru! Heb flogio ers bod yn Peru felly dyma chydig o`r hanes hyd yn hyn. Nethon ni hedfan i Lima a chyrraedd tua hanner nos ar Ebrill y 11eg. Gethon ni fws o`r dref y diwrnod wedyn felly dim ond gallu treulio chydig oriau yn Lima ei hun. Ond gethon ni ddim y teimlad ein bod ni wedi colli llawer, dim lot i weld yna a ddim yn ddinas ddiddorol iawn yr olwg. Ag yn hynod o annoying oedd pob un taxi yn beepio arnan ni, a gan gysidro bo rhan fwyaf o`r ceir ar y ffordd yn daxis oedd hynna`n digwydd yn llawer rhy aml!

Nethon ni aros 2 noson wedyn yn Nazca sy`n bellach i lawr yr arfordir. Mewn ardal sych iawn yn llawn twyni tywod, ac felly`n boeth iawn. Ond tref ddigon diddorol a`r bobl yn glên yna. Ethon ni i weld y Nazca Lines, sef lluniau o anifeiliaid wedi eu gwneud gan y bobl oedd yn byw yna yn tua`r flwyddyn 600 a sydd ond yn gallu cael eu gweld o`r awyr. Felly gethon ni drip mewn awyren fach iawn a hedfan yn isel i weld y llinellau anhygoel, peofiad eitha rhyfedd gan bod gan neb esboniad go iawn o beth ydyn nhw a pam eu bod nhw yna. Ond oedd o`n hwyl, ag yn rywbeth cofiadwy i wneud ar ben-blwydd Gwawr yn 22!! Gath hi hefyd dorri ei gwallt gan ddyn wedi gwisgo fel dynes ag oedd ddim wir yn edrych ar ei gwallt o gwbl wrth ei dorri! Ag ethon ni allan am fwyd a wedyn treulio 14 awr ar fws - pen-blwydd hapus Gwawr!

Roedd y bws yn mynd a ni i Cuzco sydd yn dref hyfryd, ond yn eitha twristaidd. Dyma lle mae`r rhan fwyaf o bobl sy`n mynd i`r dref Inca Machu Picchu yn aros, felly cymysgedd wahanol o bobl. Nethon ni ddim gwneud yr Inca Trail gan bod rhaid bookio misoedd o flaen llaw, felly nethon ni benderfynu gwneud trek oedd yn anoddach ac yn hirach ond yn dal i orffen yn Machu Picchu - ddim yn siwr os oedd hyn yn beth call neu ddim! Ta waeth, oedd on loads o hwyl er bod Gwawr wedi cael 13 blister ac yn cerdded yn droednoeth erbyn y dwrnod olaf am fod ei thraed hi`n brifo gymaint! Oedd na dri grwp yn gwneud y trek ar yr un pryd felly tua 20 ohono ni, digon o bobl i siarad efo nhw! 5 oedd yn ein grwp ni, sef Gwawr a fi, 2 ferch o`r Ariannin a boi ifanc o Loegr. Nath pawb lwyddo i gyrraedd y pwynt uchaf, sef 4,600 metr, tua dau draean i fyny Salkantay (rhai wedi talu i fynd ar gefn ceffyl!) Fi oedd y trydydd i gyrraedd y top o´r
rhai oedd yn cerdded, ag oedd o`n struggle, ond oedd mynd lawr yr ochr arall yn galed ar y penliniau hefyd! Oedd campio allan yn hwyl hefyd, ond dim llawer o gwsg i`w gael! Gethon ni reid mewn truck hefyd - diddorol, aeth o a ni i`r hot springs oedd y yr ardal - grêt i gael bath ar ôl bod mor fudr am mor hir! Uchafbwynt arall oedd croesi afon fesul tri mewn rhyw fath o gawell fetal oedd yn cael ei dynnu gan bobl ar bob ochr - lluniau ar flickr yn fuan. Oedden ni`n falch o gyrraedd yr hostel yn Aguas Cliente, sef y dref agosaf at Machu Picchu, sy`n bodoli ond oherwydd twristiaid cyn belled ag on i`n weld! Wedyn codi`n gynnar y bore wedyn er mwyn gweld y dref cyn i`r holl dwristiaid gyrraedd. Gwerth gweld y lle yn bendant, hollol anhygoel a diddorol iawn. Wedyn nôl i Cuzco er mwyn mynd allan i ddathlu ein bod ni gyd dal yn fyw, yn hytrach na cael noson dda o gwsg a fyddai falle wedi bod yn syniad gwell!

Hwyl fawr Mexico

2006-04-14T14:16:00.000-07:00

Wel, 3 dwrnod yn ôl daeth hi`n amser i ffarwelio efo Mexico. Eitha trist gan bo ni wedi mwynhau ein hun gymaint a wedi cyfarfod lot o bobl ddiddorol, ond eitha cyffrous i feddwl am be fysai yn ein disgwyl yn Peru (tywydd yr un mor boeth!) Nethon ni dreulio 2 ddwrnod yn Acapulco, sef ardal glan-y-môr eitha poblogaidd yn Ne Mexico. Ar ôl trafferth yn ffeindio`r hostel am 10 o`r gloch y nos oedd hi`n grêt gweld bod na bwll nofio yna felly mewn a ni am swim yn y tywyllwch! Oedd yr hostel yn ardal y Mecsianwyr felly aethon ni i´r traeth hwnnw y dwrnod wedyn. Dim pobl wyn i weld o gwmpas felly tynnu dipyn o sylw ag ar ôl cael ein hasslo am ryw 10 munud, Manuela a fi yn cytuno i gael braidio ein gwallt - wel, hanner ein gwallt! Ewch i weld yn lluniau i a rhoi eich barn - dwi`n meddwl bo nhw`n gwneud i`n nhalcen i edrych braidd yn fawr felly falle nai dynnu nhw allan yn fuan, ond ma nhw`n handi ar y funud achos sdim rhaid i fi olchi`ng ngwallt!

Y dwrnod canlynol ethon ni i draeth twristiaid oedd yn llawer mwy ond yr un mor brysur. Y dref braidd yn afiach - llwyth o siopau American a Mc Donalds a.y.y.b felly nethon ni ddim treulio gormod o amser yna. Cael ein perswadio i gerdded dipyn i ryw flea market guddiedig gan Fecsican clêl o´r enw Arturo a ffeindio chydig o bethau bach i brynu. Manuela yn prynu pâr o cowboy boots melyn wedi eu gwneud o groen alligator! A bargeinio i gal nhw am tua hanner y pris cychwynnol, sef 1,400 peso, sef tua 70 punt! Aethon ni fyy yn uwch na`r dref wedyn i weld pobl yn ´cliff-jumping´- ma`r ardal yn eitha enwog am hyn. Dipyn o bobl wedi ymgasglu, ond oedd o ddim yn sbeshal - yr haul yn machlud yn lot mwy arbennig!

Ag felly ar ôl taith 6 awr ar y bws yn ôl i Ddinas Mecsico a chymryd y metro at y maes awyr, oedd yn dipyn o sialens efo`r bagiau mawr a 3 newid gorsaf metro, daeth ein taith ym Mecsico i ben a ffwrdd a ni i Peru!

Wythnos wedi bod!

2006-04-10T08:34:00.000-07:00

Methu coelio mai dim ond wythnos i ddoe oedden ni´n hedfan allan! Teimlo fel llawer mwy ers oedden ni adre, ond eto ma´r wythnos wedi mynd yn sydyn iawn a ni wedi llwyddo i neud llawer!

Da ni yn Acapulco ar arfordir y De erbyn hyn. Er bo Dinas Mexico yn ddiddorol iawn a llawn amrywiaeth, oedd na gymaint o bobl yna a´r aer yn llawn llygredd, mae´n braf iawn gadael! Rhai o´r uchafbwyntiau oedd y Templo Mayor - sef gweddillion teml fawreddog yr Aztecs a gafodd ei hail adeiladu 7 gwaith gan bobloedd gwahanol. Mae reit ynghanol y ddinas yn yr awyr agored felly braidd yn swreal cerdded o amgylch y sylfeini gan glywed synnau´r ddinas yn y pellter! Hefyd, mae´n werth ymweld â´r Amgueddfa Anthropoleg - llawer o wybodaeth am yr holl bobl a llwythi sydd wedi ac sydd yn byw yn Mexico. Hynod o ddiddorol ond braidd gormod o wybodaeth, sa wedi cymryd dwrnod cyfan i ddarllen popeth yna!

Tua awr i´r Gogledd o Ddinas Mexico mae pyramids mawreddog y Teotihuacan a adaeiladwyd gan bobl o´r un enw tua 300bc ag oedd ar un adeg yn gartre i dros 150,000 o bobl. Mae nhw wir werth eu gweld - ag oedd hyd yn oed yr holl bobl leol yn trio pwsio chi i brynu ryw geriach amrywiol ddim yn effeithio ar y profiad! Er bod hi braidd yn boeth, nethon ni lwyddo i gyrraedd top pyramid yr haul - sef yr un mwyaf! A wedyn nethon ni ddarganfod bwyty rili cwl mewn ogof, yn y pentre tu allan i´r ddinas - ag erbyn i ni gerdded nôl drwy´r pyramids oedden nhw´n hollol wag, dim ond ni oedd yna - chydig yn spooky!

Ok, oedd y bwyty yma i weld yn cwl ar y pryd, ag nes i ond cal rhyw fath o blatiad eitha bach o tacos blasus iawn. Ond drwy´r noson honno, on i yn sâl iawn! Ai ddim i fewn i fanylion ond gair i gall - peidiwch a byta pork yn Mexico - wel, mae´n debyg fod o o safon gwell yn y de! Ta waeth - nath y salwch olygu bo fi yn colli noson o clubbio yn Ninas Mexico - on i braidd yn gytud, ond teimlo lot gwell pan nath Gwawr ddisgrifio´r clwb fel "tebyg i´r Octagon"!!!

Felly er bo ni´n falch o adael y ddinas, mae 5 dwrnod yna yn jest digon, nethon ni yn bendant fwynhau. Teimlo yn ddigon saff yno yn rhan fwyaf o´r ardaloedd. Y Metro yn wych - gallu mynd i unrhyw le o gwbl yn y ddinas am tua 10 ceiniog! A rhwng 5 a 10 y nos carriages arbennig ar gyfer merched. Ond, dwi ddim yn meddwl bo fi wedi bod yn unrhyw le efo cweit gymaint o bobl - pobl ymhobman bron. Ma nhw yn glên yna, yn trio gwerthu bob dim dan haul i chi, a´r creeps yn y lleiafrif. Ond y mwya gwyn ydy rhywun, y mwya o sylw ma nhw´n tynnu - ag allwch chi ddim cal lot mwy gwyn na Gwawr a fi! O, ag oedd yr hostel yn grêt - Hostel Amigo os di rhywun yn ymweld â´r ddinas - staff rili clên a lle digon cymdeithasol efo lot o deithwyr o wledydd gwahanol.

Mwy o luniau a blog Gwawr ar y links. A fyddai nôl yn fuan, ella yn frown i gyd! Wel, ok, ella ddim, da ni ddim yn disgwyl gwyrthiau!!

Dinas Mexico!

2006-04-03T15:13:00.000-07:00

Wel, wedi cyrraedd o'r diwedd! Ar ôl hedfan am 11 awr o Heathrow - sypreis bach neis oedd yn bod ni yn hedfan dros Gymru fach, a hefyd Aberystwyth - oedd na enw Sbaeneg am Aber hefyd ond dwi ddim yn cofio be oedd o yn anffodus! Ta waeth - flight lyfli efo British Airways a sgrin o flaen bob sêt, a bwyd neis - impressive iawn! Wedyn cyrraedd y maes awyr a chal taxi i'r hostel sydd yn lyfli. Er bo ni mewn stafell sy'n cysgu 10 dim ond 3 ohonom ni sydd yna ar y funud. Ma na common room efo teledu mawr a loads o lyfrau a da ni'n gallu mynd ar y wê yma am ddim! A ma na far neis yr olwg yma, ond oedden ni wedi blino gormod efo jet lag i fynd yna neithiwr.

Mae'n debyg mai Dinas Mexico ydy'r brifddinas uchaf yn y byd (siwr bo fi wedi darllen hynna yn rwle - ymddiheuriadau os dio'n anghywir!) felly y cyngor yw i beidio gwneud dim byd sy'n gofyn am ormod o egni yn eich dyddiau cyntaf yno er mwyn dod i arfer efo'r uchder. Dwi'n teimlo'n iawn ar y funud a ninnau wedi bod yma am agos i 20 awr, ond dydy Gwawr na'r Almaenes sy'n rhannu stafell efo ni ddim mor lwcus.

Felly wedi bod yn cerdded rownd y ddinas chydig heddiw (wel, am agos i 5 awr ma'n siwr) - mynd ar goll chydig bach ond cyrraedd yn ôl yn saff, a wedi prynu map fel bo ni'n gallu dod i nabod y lle yn well. Dinas eithaf amrywiol - wedi bod yn farchnad fwya dwi erioed wedi bod ynddi, ar hyd strydoedd bach oedd yn para am byth - hollol ddi-ddiwedd! Gwerthu pob math o bethau, llawer o fwyd, nethon ni ond mentro efo rhyw fath o greision blasus a sôs eitha spicy. Pobl yn edrych yn eitha tlawd yno. Ond mewn ardaloedd eraill, dynion wedi gwisgo yn weddol smart ag yn ceisio gwerthu dvd's, ffonau a pethau technolegol eraill ar ochr y stryd. Llwythi o siopau dillad a sgidiau ar lawer o'r prif strydoedd, ond nethon ni ddim lwyddo i ddod ar draws archfarchnad neu hyd yn oed siop gornel fach yn gwerthu dipyn o fwyd! Ar ôl darllen bod pobl yn gyrru yn wyllt yma, dydy hi ddim mor ddrwg ag on i'n feddwl, ond ma na yn bendant or-ddefnydd o'r corn - bob awr o'r dydd a'r nos!

Am ryw reswm, mae'r amgueddfeydd wedi cau yma ar ddydd Llun felly nethon ni neud nodyn o ambell un fysai'n apelio. Yr ardal hanesyddol neu'r 'Centro Historico' (dwin meddwl mai fel na ma sillafu fo!) sydd i weld y rhan fwyaf diddorol ag yn lwcus dyna lle ma'r hostel, felly gawn ni ddigon o amser i edrych o gwmpas. Yn y cyfamser, rhaid ymarfer dipyn ar y Sbaeneg! Sori, bod na ddim lluniau - tro nesa!

3 Dwrnod i fynd!!

2006-03-30T06:48:00.000-08:00

Helo bawb! (neu jest pwy bynnag sy'n darllen!)
Sori am ddim blogio cynt, isio cadw'r suspense! Na, sori, jest dim amser na methu bod yn bothered! Prysur yn gweithio a phacio a phartîo! Diolch i bawb am ddod i ffarwelio â ni yn Aber nos Sadwrn, gweler luniau (gobeithio! - tro cynta i fi neud hyn!) Fyddai nôl yn fuan - angen mynd i siopa am fanion bethau!

Yn y dechreuad...

2006-02-25T15:43:00.000-08:00

Hm, ddim yn siwr os ydy hwn yn mynd i weithio. Ond croeso! Wedi cychwyn y blog yma fel rhyw fath o ddyddiadur ar gyfer pan fyddai yn teithio (5 wthnos i fynd!!!). Pwrpas hyn yw gobeithio treulio llai o amser yn e-bostio pobl cos allith unrhyw un sydd isio gwbod os ydw i dal yn fyw a.y.y.b. ddarllen hwn! Sori - ddim yn bersonol iawn (ma siwr nai anfon at rai ohono chi!) Dwi'n meddwl bod modd rhoi lluniau ar hwn gobeithio hefyd. Sori, mae'n mynd i gymryd dipyn o amser i fi weithio allan yr ins a'r outs o hwn felly amynedd plis!!!